ⵜⵉⵏⴰⵡⴰⵜ: ⵜⴰⵏⵣⴱⴰⵢⵜ ⵖⵔ ⵉⵎⴰⵣⵉⵖⵏ ⵏ ⵍⴰⵟⵍⴰⵚ ⴷ ⵢⵉⴼⴼⵓⵙ ⵏ ⵍⵇⴱⵍⵜ (1900-1936): ⵉⵎⵔⵉⴳⵏ ⴷ ⵜⵟⴰⴽⵜⵉⵜ ⴷ ⵜⵚⵟⵕⴰⵜⵉⵊⵉⵜ
ⴳ ⵉⴳⵔ ⵏ ⵉⵎⵉⵔⵏ ⵏ ⵜⵉⵏⴰⵡⵉⵏ ⵏⵏⵙ, ⵉⵙⵏⵎⴰⵍⴰ ⵡⴰⵎⵎⴰⵙ ⵏ ⵜⵖⵓⵔⵉ ⵏ ⵓⴼⴳⴰⵏ ⴷ ⵓⵎⴰⴷⴰⵏ ⵢⴰⵜ ⵜⵉⵏⴰⵡⵜ ⵅⴼ “ⵜⵏⵣⴱⴰⵢⵜ ⵖⵔ ⵉⵎⴰⵣⵉⵖⵏ ⵏ ⵍⴰⵟⵍⴰⵚ ⴷ ⵢⵉⴼⴼⵓⵙ ⵏ ⵍⵇⴱⵍⵜ (1900-1936): ⵉⵎⵔⵉⴳⵏ ⴷ ⵜⵟⴰⴽⵜⵉⵜ ⴷ ⵜⵚⵟⵕⴰⵜⵉⵊⵉⵜ”, ⴰⵙⵙ ⵏ ⵓⴽⵕⴰⵙ 06 ⴱⵕⴰⵢⵕ 2013 ⴳ ⵓⵙⴽⵓ ⵏ ⵓⵙⵉⵏⴰⴳ. ⵜⵉⵏⴰⵡⵜ ⴰⴷ ⵉⵙⵎⵓⵙⵙⴰ ⵜⵜ ⵓⵏⵎⵀⴰⵍ ⵎⵓⵃⵎⵎⴷ ⴰⵢⵜ ⵃⵎⵣⴰ, ⵉⴽ ⵜⵜ ⵉⵜ ⴰⵎⵔⵣⵉ ⵎⴰⵢⴽⵍ ⴱⴰⵢⵔⵓⵏ.
ⵢⴰⵎⵓ ⴳ ⵜⵉⵏⴰⵡⵜ ⴰⴷ ⵓⵏⴱⴷⴰⴷ ⵏ ⵓⵙⵉⵏⴰⴳ ⵎⴰⵙⵙ ⵃⵎⴰⴷ ⴱⵓⴽⵓⵙ ⴷ ⵉⵎⵔⵣⵓⵜⵏ ⵏ ⵓⵙⵉⵏⴰⴳ ⴷ ⵉⵙⵍⵎⴰⴷⵏ ⵏ ⵜⵙⴷⴰⵡⵉⵜ ⴷ ⵉⵎⵍⵜⴰⵖ ⵏ ⵜⵎⵙⵎⵓⵏⵉⵏ ⴷ ⵉⵏⵖⵎⴰⵙⵏ ⴷ ⵎⵉⴷⴷⵏ ⵉⴼⴽⴰⵏ ⵜⴰⵖⴹⴼⵜ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ.
ⵜⵙⵙⵏⴽⴷ ⵜⵉⵏⴰⵡⵜ ⵏ ⵓⵎⵔⵣⵓ ⴰⵖⴰⵔⴰⵙ ⵏ ⵜⵏⵣⴱⴰⵢⵜ ⵏ ⵉⵎⴰⵣⵉⵖⵏ ⴳ ⵜⵙⴳⴰ ⵏ ⵍⴰⵟⵍⴰⵚ ⴷ ⵉⴼⴼⵓⵙ ⵏ ⵍⵇⴱⵍⵜ, ⵜⵙⵉⵡⵍ ⴰⵡⴷ ⵅⴼ ⵜⵏⵣⴱⴰⵢⵜ ⴳ ⵔⵔⵉⴼ ⴷ ⵉⴼⴼⵓⵙ ⵏ ⵜⵎⵓⵔⵜ. ⵉⵙⴰⵡⵍ ⵉⵎⵔⵣⵉ ⵅⴼ ⵉⵎⵏⵖⴰⵏ ⵉⵎⵇⵇⵔⴰⵏⵏ ⴷ ⵉⵎⵔⵉⴳⵏ ⵏ ⵉⵏⵣⴱⴰⵢⵏ ⴷ ⵜⵟⴰⴽⵜⵉⵜ ⵏⵏⵙⵏ ⴷ ⵜⵙⵟⵕⴰⵜⵉⵊⵉⵜ ⵏⵏⵙⵏ.
ⵉⵏⵏⴰ, ⴳ ⵜⵙⴳⴰ ⵏ ⵉⵎⵔⵉⴳⵏ ⵉⴷ ⵉⵏⵣⴱⴰⵢⵏ ⵉⵡⴹⵏ ⴰⴷ ⴽⴽⴰⵙⵏ ⵉⵎⵔⵉⴳⵏ ⵉⵎⵏⴰⵡⴰⵢⵏ ⵙⴳ ⵖⵓⵔ ⵉⵏⴳⵍⵉⵣⵉⵢⵏ ⴷ ⵉⴽⵓⵙⵙⵉⵢⵏ ⵏⵏⴰ ⵜⵏ ⵉⵣⵣⵏⵣⴰⵏ ⴳ ⵍⵎⵖⵔⵉⴱ: ⵉⵍⵍⴰ ⵙⴰⵙⴱⵓ ⴷ ⵓⵔⵉⵎⵉⵏⴳⵜⵓⵏ ⴷ ⵜⵡⵉⵏⵛⵉⵙⵜⵔⵜ ⴷ ⵍⵓⴱⵉⵍ ⴷ ⵓⵎⵓⵙⴽⵓⵜⵜⵓⵏ. ⵉⵎⵔⵉⴳⵏ ⵉⴼⵙⵙⵓⵙⵏ ⵎⴰⴽ ⴷ ⵢⵓⵙⴰⵏ ⴷ ⵡⴰⵏⴰⵡ ⵏ ⵉⵎⵏⵖⵉ ⴷ ⵜⵏⵣⴱⴰⵢⵜ ⵏ ⵉⵎⴰⵣⵉⵖⵏ.
ⵏⴳⵔ ⵉⵎⵏⵖⴰⵏ ⵉⵎⵇⵇⵔⴰⵏ ⵏⵏⴰ ⵉⵙⴷⵓⵇⵇⵕⵏ ⴰⵏⴽⵊⴰⵎ, ⵉⵙⴰⵡⵍ ⵓⵎⵔⵣⵓ ⵅⴼ ⵉⵎⵏⵖⴰⵏ ⵏ ⵍⵀⵔⵉ, ⵍⵇⵙⵉⴱⴰ ⴷ ⵜⴰⵣⵉⵣⴰⵡⵜ ⴷ ⵃⵎⴷⵓⵏ ⴷ ⴰⵏⵡⴰⵍ ⴷ ⴱⴰⴷⴷⵓ ⴷ ⴱⵓⴷⵏⵉⴱ ⴷ ⴱⵓⴳⴰⴼⵔ ⴷ ⵜⵉⵛⵛⵓⴽⵜ ⴷ ⴰⵢⵜ ⵉⵄⵇⵓⴱ ⴷ ⴰⵢⵜ ⴱⴰⵄⵎⵕⴰⵏ.
ⵙⴳ ⵜⵟⴰⴽⵜⵉⵜⵉⵏ ⵏ ⵉⵏⵣⴱⴰⵢⵏ ⵉⵍⵍⴰ ⵓⵏⵏⵉⵍⴰ (ⴰⵎⴽ ⵉⴳⴰ ⵎⵓⵃⴰ ⵓ ⵃⵎⵎⵓ ⵉⴷⴷⵖ ⵉⵏⵏⵓⵍⴰ ⴰⵏⴽⵊⴰⵎ ⴳ ⵡⴰⴷ ⵣⵎ), ⵜⵓⴼⴼⵔⴰ (ⵏⵏⴰ ⵏⵜⵜⴰⴼⴰ ⵖⵓⵔ ⴰⵢⵜ ⵃⵎⵎⵓ ⵏ ⵜⵍⵙⵙⵉⵏⵜ), ⵓⴳⴳⵓⵣ (ⵏⵏⴰ ⵉⵜⵜⴳⴳⴰ ⵣⴰⵢⴷ ⵓ ⵃⵎⴰⴷ) ⴷ ⵉⵏⵏⵉⵍⴰⵜⵏ ⵏ ⴳ ⵢⵉⴹ. ⵜⵉⵟⴰⴽⵜⵉⵜⵉⵏ ⴰⴷ ⵍⵍⴰⵏ ⴷⴼⴼⵉⵔ ⵏⵏⵙⵏⵜ ⵉⵎⵖⴰⵔⵏ ⵏ ⵉⵎⵏⵖⵉ ⵣⵓⵏⴷ ⵎⵓⵃⴰ ⵓ ⵃⵎⵎⵓ ⴰⵥⴰⵢⵢⵉ ⴷ ⵎⵓⵃⴰ ⵓ ⵙⵄⵉⴷ ⴷ ⵙⵉⴷⵉ ⵄⵍⵉ ⴰⵎⵀⴰⵡⵛ ⴷ ⵄⵙⵙⵓ ⵓ ⴱⴰⵙⵍⴰⵎ ⴷ ⵄⴱⴷⵍⴽⵔⵉⵎ ⴷ ⵓⵙⴽⵓⵏⵜⵉ ⴷ ⵣⴰⵢⴷ ⵓ ⵃⵎⴰⴷ...
ⴳ ⵜⵉⵏⴰⵡⵜ ⵏⵏⵙ, ⵢⵉⵡⴹ ⵓⵎⵔⵣⵓ ⵖⵔ ⵎⵏⵏⴰⵡⵜ ⵏ ⵜⵏⴰⵟⵟⵓⴼⵉⵏ : ⵜⴰⵙⵟⵕⴰⵜⵉⵊⵉⵜ ⵏ ⵓⵏⵏⴰⵍ ⵏ ⵉⵏⵣⴱⴰⵢⵏ ⴷ ⵜⵉⵡⵉⵣⵉ ⵉⴽⴽⴰⵏ ⵏⴳⵔ ⵏ ⵜⵇⴱⵉⵍⵉⵏ ⴷ ⵡⴰⵜⵉⴳ ⵉⵍⵍⴰⵏ ⴷⴰⵔ ⵜⵎⵟⵟⵓⴹⵜ ⵜⴰⵎⴰⵣⵉⵖⵜ ⴳ ⵉⵎⵏⵖⴰⵏ ⵉⴽⴽⴰⵏ.
ⵜⵉⵡⵉ ⴷ ⵜⵉⵏⵏⴰⵡⵜ ⴰⵡⴷ ⵅⴼ ⴰⵏⴰⵡⵏ ⵏ ⵉⵙⵔⴷⴰⵙⵏ ⵏ ⴼⵕⴰⵏⵚⴰ: “ⵉⴳⵓⵎⵉⵢⵏ” ⵏⵏⴰ ⴳ ⴰⵎⵓⵏⵜ ⵜⵇⴱⵉⵍⵉⵏ ⵉⵜⵜⵢⴰⵔⵔⴰⵏ, ⵙ ⵓⵙⵜⵉ ⵜⵉⵏ ⵥⴰⵢⵢⴰⵏ ⴷ ⴰⵢⵜ ⵙⵖⵔⵓⵛⵛⵏ ⴷ ⴰⵢⵜ ⵡⴰⵕⴰⵢⵏ. ⵜⵉⵍⵉ “ⵍⴱⵕⵟⵉⵥⵥ” ⵉⵜⵜⴰⵎⵓⵏ ⴳ ⵢⴰⵏ ⵉⵏⵉⵖⵉ, ⵉⵜⵜⵏⴰⵍⴰⵏ ⵉⵏⵣⴱⴰⵢⵏ ⵉⵖⵉⵢⵏ ⴰⴷ ⴰⴽⵔⵏ ⵙⴷⵓⵇⵇⵕⵏ ⵜⴰⵇⴱⵉⵍⵜ, ⵉⵍⵉⵏ “ⵉⵚⴱⴰⵃⵉⵢⵏ” ⴳ ⴰⵎⵓⵏ ⵉⵙⵔⴷⴰⵙ ⵏ ⴷⴷⵣⴰⵢⵔ ⴷ ⵡⵉⵏ ⵍⵎⵖⵔⵉⴱ, ⵉⵍⵉⵏ “ ⴰⵢⵜ ⵍⴰⵍⵉⵊⵓ” ⵉⴳⴰⵏ ⵉⴱⵕⵕⴰⵏⵉⵢⵏ ⵉⵜⵜⵓⵙⴳⴰⵊⴰⵏ ⴳ ⵜⵎⴷⵉⵏⵜ ⵏ “ⵎⴰⵔⵙⵉⵢ” ⴷⴷⵓⵏ ⵙ ⵡⵀⵕⴰⵏ ⴷ ⴱⵍⵄⴱⴱⴰⵙ ⴷⴰⵜ ⴰⴷ ⴷⴷⵓⵏ ⵙ ⵍⵎⵖⵔⵉⴱ.
ⴳ ⵜⵢⵉⵔⴰ ⵏ ⵜⵉⵏⴰⵡⵜ ⴰⴷ, ⵉⴽⴽⴰ ⵓⵎⴷⵉⴽⴰⵕ ⵉⴱⵓⵖⵍⴰⵏ. ⵉⵙⵇⵙⵉⵜⵏ ⴷ ⵉⵙⵏⵉⵖⵉⵙⵏ ⴰⵔ ⵙⵙⵓⵜⵓⵔⵏ ⴰⴷ ⵜⵜⵓⴼⴽ ⵜⵖⴹⴼⵜ ⵉ ⵡⴰⵏⴰⵡ ⴰⴷ ⵏ ⵓⵔⵣⵣⵓ ⵉⴱⴷⴷⴰⵏ ⵅⴼ ⵓⵢⴷⴰ ⴰⵏⵎⴹⴰⵏ ⴷ ⵉⵏⵉⴳⴰⵏ ⵏ ⵜⵙⴳⴳⵉⵡⵉⵏ, ⵃⵎⴰ ⴰⴷ ⵓⵔ ⵉⵜⵜⴰⵡⵉ ⵓⵔⵣⵣⵓ ⵖⴰⵙ ⵅⴼ ⵡⴰⵔⵔⴰⵜⵏ ⵉⵜⵜⵢⴰⵔⴰⵏ ⵉⵙⵡⵉ ⵉⴳⴰ ⵜ ⴰⴷ ⵏⵙⴱⵓⵖⵍⵓ ⵢⴰⵏ ⵓⴼⵔⴷⵉⵙ ⵏ ⵓⵎⵣⵔⵓⵢ ⵏⵏⵖ ⴰⵏⴰⵎⵓⵔ ⵏⵙⴱⵓⵔⵣ ⵉⵎⵉⴳⴳⵉⵜⵏ ⵏⵏⴰ ⴷⵉⴳⵙ ⵢⴰⵎⵓⵏ.
ⵎ. ⵎⵓⵅⵍⵉⵚ
