ⴰⵙⴳⵎⵉ ⵉⵍⴰⵏ ⵜⴰⵖⴰⵔⴰ ⴷ ⵜⵓⵜⵍⴰⵢⵜ/ⵜⵓⵜⵍⴰⵢⵉⵏ ⵏ ⵓⵙⵙⵍⵎⴷ ⴷ ⵜⵢⴰⴼⵓⵜ ⵏ ⵓⵍⵎⵎⵓⴷ
ⴰⴷ ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵜⵎⴷⵔⴰⵡⵜ ⵏ ⵓⵙⵉⵔⴰ ⵏ ⵢⵓⵏⵉⵙⴽⵓ ⴳ ⵍⵎⵖⵔⵉⴱ ⴰⵎⵇⵔⴰⵏ ⵢⴰⵏ ⵓⵎⵓⵙⵙⵓ ⵉⵥⵍⵉⵏ ⵙ ⵡⴰⵙⵙ ⴰⵎⴹⵍⴰⵏ ⴰⴳⵔⴰⵖⵍⴰⵏ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴰⵙⵙ ⵏ 04 ⵎⴰⵕⵚ 2016 ⴳ ⵓⵙⵉⵏⴰⴳ.
ⴰⵎⵓⵙⵙⵓ ⴰⴷ ⴳⵉⵙ ⵙⵉⵏ ⵡⴰⴼⵔⵉⵡⵏ, ⵉⴼⵔ ⴰⵎⵣⵡⴰⵔⵓ ⵉⵥⵍⵉ ⵙ ⵜⵡⵓⵔⵉ ⵜⴰⴳⴰⴷⵉⵎⵉⵜ ⴷ ⵜⵎⴰⵙⵙⴰⵏⵜ, ⵢⴰⵎⵓ ⵙⵏⴰⵜ ⵜⵉⵏⴰⵡⵉⵏ, ⵢⴰⵜ ⵔⴰⴷ ⵜⵜ ⵉⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵉⵖⵜ, ⵜⵉⵙ ⵙⵏⴰⵜ ⵢⵓⵏⵉⵙⴽⵓ. ⵔⴰⴷ ⵎⵍⵏⵜ ⵜⵉⵏⴰⵡⵉⵏ ⴰⴷ ⴰⴷⵖⴰⵔ ⴰⴽⵙⵡⴰⵜ ⵏ ⵜⵓⵜⵍⴰⵢⵉⵏ ⵜⵉⵢⵎⵎⴰⵜⵉⵏ ⴷ ⵡⵉⵏ ⵜⵎⵢⴰⵡⴰⵏⵜ ⵜⴰⵙⵏⵉⵍⵙⵜ ⴳ ⵓⵙⴱⵓⵖⵍⵓ ⵏ ⵢⴰⵏ ⵓⵙⴳⵎⵉ ⵉⵍⴰⵏ ⵜⴰⵖⴰⵔⴰ. ⴰⵢⴰ ⴷ ⵢⴰⵏ ⴳ ⵉⵡⵜⵜⴰⵙⵏ ⵏ ⵓⵖⴰⵡⴰⵙ ⴰⵎⴰⵢⵏⵓ ⵏ ⵓⵙⴳⵎⵉ ⴰⵙⵓⵍⴰⵏ ⵏ ⵜⵎⵜⵜⴰ ⵎⵓⵏⵏⵉⵏ ⴳ ⵓⵎⵏⵉⴷ ⵏ 2030.
ⵉⴼⵔ ⵡⵉⵙ ⵙⵉⵏ ⴷ ⴰⴼⵓⴳⵍⴰⵏ, ⴰⵔ ⵉⵙⴼⵓⴳⵍⵓ ⵙ ⵜⵓⵜⵍⴰⵢⵉⵏ ⵜⵉⵢⵎⵎⴰⵜⵉⵏ ⵏ ⵓⵎⴰⴹⴰⵍ ⵙ ⵉⵣⵍⴰⵏ ⴷ ⵓⵙⵉⵢⵙ ⴷ ⵜⵖⵔⵉ ⵏ ⵜⵎⴷⵢⴰⵣⵉⵏ. ⵓⵔⴰⵔⵏ ⴰⴷ ⵙⵙⵎⵏⵉⴷⵏ ⵜⵏ ⵉⵎⵎⴷⵔⴰⵡⵏ ⵍⵙⴰⵏⵉⵏ ⵜⵉⵎⵍⴰⵙⴰ ⵜⵉⵇⴱⵓⵕⵉⵏ ⵏ ⵜⵎⵓⵔⴰ ⵏⵏⵙⵏ, ⵜⵙⵜⵉ ⵜⵏ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵏ ⵓⵙⴳⵎⵉ, ⴷ ⵢⵓⵏⵉⵙⴽⵓ, ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.
ⵙ ⵓⵎⵓⵙⵙⵓ ⴰ ⴷ ⵏⵏⵉ ⴳ ⵔⴰⴷ ⵃⴰⴹⵕⵏ ⵉⴳⵏⵙⴰⵙ ⵉⴷⵉⴱⵍⵓⵎⴰⵙⵉⵢⵏ ⴳ ⵜⵎⵓⵔⵜ ⵏⵏⵖ, ⵙⵙⵉⵜⵉⵎⵏ ⵉⵎⴷⵔⴰⵡⵏ ⴰⴽⴽⵯ ⴰⴷ ⵎⵍⵏ ⴰⵎⵢⴰⵏⴰⵡ ⵏ ⵜⵓⵜⵍⴰⵢⵉⵏ ⵜⵉⵢⵎⵎⴰⵜⵉⵏ ⵉ ⵉⵍⵍⴰⵏ ⴳ ⵍⵎⵖⵔⵉⴱ, ⵙⵙⵉⵍⵉⵏ ⵜⴰⵎⵢⴰⵏⴰⵡⵜ ⵜⴰⵙⵏⵉⵍⵙⵜ, ⵃⴰⴱⵔⵏ ⵜⴰⵏⵏⴰⵢⵜ ⵉⵜⵜⵉⵏⵉⵏ ⵓⵔ ⵉⵜⵜⴱⴱⵉ ⵓⵎⵢⴰⵏⴰⵡ ⴰⵎⵙⵉⵡⵍ ⵏⴳⵔ ⵜⴷⵍⵙⵉⵡⵉⵏ. ⵉⴳⴰ ⵓⵎⵢⴰⵏⴰⵡ ⴰⴷ ⵢⴰⵜ ⵜⴰⴳⴳⴰⵍⵜ ⵍⵍⵉ ⵙ ⵉⵅⵚⵚ ⴰⴷ ⵜⵜ ⵏⴳ ⵃⵎⴰ ⴰⴷ ⵓⵔ ⵏⴼⵍ ⴰⵡⴷ ⵢⴰⵏ, ⵏⴱⵏⵓ ⵢⴰⵏ ⵉⵎⴰⵍ ⵉⴷⵓⵙⵏ ⵉ ⵇⵇⴰⵃ ⵉⵡⴷⴰⵏ. ⵉⴳ ⵓⵡⵜⵜⴰⵙ ⵏ ⵜⵡⵓⵔⵉ ⴰⴷ ⴰⴷ ⵏⵎⵍ ⵎⴰ ⵅⴼ ⴳⴰⵏⵜ ⵜⵓⵜⵍⴰⵢⵉⵏ ⵜⵉⵢⵎⵎⴰⵜⵉⵏ ⴰⴼⵔⴷⵉⵙ ⵢⴰⴽⴽⴰⵏ ⵢⴰⵏ ⵓⵙⴳⵎⵉ ⵉⵍⴰⵏ ⵜⴰⵖⴰⵔⴰ, ⴰⵙⴳⵎⵉ ⵍⵍⵉ ⵢⴰⴽⴽⴰⵏ ⵜⴰⵙⵉⵎⴰⵏⵜ ⵏ ⵉⵡⴷⴰⵏ ⴷ ⵡⴰⵎⵓⵏⵏ ⵏⵏⵙⵏ.
