ⴰⵙⵙ ⵏ ⵜⵖⵓⵔⵉ ⵅⴼ : ⴰⵙⵙⵉⵍⵉ ⵏ ⵓⵙⵙⵍⵎⴷ ⵏ ⵜⴰⵎⴰⵣⵉⵖⵜ ⴳ ⵉⵙⵏⴼⴰⵔⵏ ⵉⵎⵢⴰⴷⴰⴼⵏ
ⵔⴰⴷ ⵉⵙⵏⵎⴰⵍⴰ ⵡⴰⵎⵎⴰⵙ ⵏ ⵓⵔⵣⵣⵓ ⴰⴷⵉⴷⴰⴽⵜⵉⴽⵉ ⴷ ⵉⵖⴰⵡⴰⵙⵏ ⵉⴱⵉⴷⴰⴳⵓⵊⵉⵢⵏ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵓⵎⵢⴰⵡⴰⵙ ⴷ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴷ ⵜⵏⵎⴰⵍⴰⵢⵜ ⵏ ⵍⵢⵓⵏⵉⵙⵉⴼ ⵢⴰⵏ ⵡⴰⵙⵙ ⵏ ⵜⵖⵓⵔⵉ ⵅⴼ : « ⵓⵙⵙⵉⵍⵉ ⵏ ⵓⵙⵙⵍⵎⴷ ⵏ ⵜⴰⵎⴰⵣⵉⵖⵜ ⴳ ⵉⵙⵏⴼⴰⵔⵏ ⵉⵎⵢⴰⴷⴰⴼⵏ ⴰⵎⴷⵢⴰ ⵏ ⵓⵎⴰⵜⵜⵉⵡ ⴰⴱⵉⴷⴰⴳⵓⵊⵉ ⵏ ⵜⴷⴰⵍⵉⵡⵉⵏ ⵉⵛⵛⴰⵔⵏ».
ⵉⴷⴷⴰ ⴷ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵜⵎⴷⵔⴰⵡⵜ ⵉⵍⵍⴰⵏ ⵉⵏⴳⵔ ⵜⵎⴰⵡⴰⵙⵜ ⴷ ⵓⵙⵉⵏⴰⴳ. ⵜⴰⵎⴷⵔⴰⵡⵜ ⴰⴷ ⵏⵏⴰ ⴷ ⵉⴼⴽⴰⵏ ⴰⴼⴰⵔⵙ ⵏ ⵓⵎⴰⵜⵜⵉⵡ ⴰⴱⵉⴷⴰⴳⵓⵊⵉ ⵏ ⵜⵎⴰⵣⵉⵖⵜ ⵏ ⵜⴷⴰⵍⵉⵡⵉⵏ ⵉⵛⵛⴰⵔⵏ ⵏⵏⴰ ⵉⵜⵜⵓⴳⴰⵏ ⵙ ⵓⵎⵢⴰⵡⴰⵙ ⵉⵏⴳⵔ ⵓⵙⵉⵏⴰⴳ ⴷ ⵡⴰⵎⵎⴰⵙ ⴰⵏⴰⵎⵓⵔ ⵏ ⵓⵙⵎⴰⵢⵏⵓ ⴰⵙⴳⵎⴰⵏ ⴷ ⵜⵙⵉⵔⵉⵎⵉⵜ.
ⵙⵙⵉⵜⵉⵎⵏ ⵉⵎⵙⵓⴷⵙⵏ ⵏ ⵓⵏⵎⵓⵇⵇⴰⵔ ⴰⴷ ⴰⴷ ⵎⵓⵏⴻⵏⵜ ⵜⵣⵎⵎⴰⵔ ⵏ ⵎⴰⵕⵕⴰ ⵜⵎⵔⵙⴰⵍⵉⵏ ⴷ ⵉⵎⵙⴽⴰⵔⵏ ⵉⵙⵡⵓⵔⵉⵏ ⴳ ⵢⵉⴳⵔ ⵏ ⵓⵙⵙⵍⵎⴷ ⴰⴼⴰⴷ ⴰⴷ ⵢⵉⵍⵉ ⵡⵓⴹⵓⴼ ⵏ ⵜⵓⵜⵍⴰⵢⵉⵏ ⴷ ⵓⵙⵢⴰⵏⴰⵡ ⵏⵏⵙⵏⵜ ⴳ ⵓⵙⵙⵍⵎⴷ, ⴰⵎⵓⵅ ⴷ ⵢⵓⵙⴰ ⴳ ⵜⴰⵔⴰⵜⵉⵏ ⵜⵉⵙⵜⵔⴰⵜⵉⵊⵉⵜⵉⵏ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ ; ⵙⵍⴰⵡⴰⵏ ⴰⴽⴽⵯ ⴰⵢⵏⵏⴰ ⵉⵣⴷⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⴷⴷⵖ ⵜⴳⴰ ⵜⵓⵜⵍⴰⵢⵜ ⵜⴰⵎⴰⴷⴷⴰⴷⵜ ⵏⵏⴰ ⵉⵅⵚⵚⴰ ⴰⴷ ⵏⵙⵙⵉⵍⵉ ⵙ ⵓⵙⵙⵍⵎⴷ ⵏⵏⵙ ⴳ ⵜⵉⵏⵎⵍ ⵜⴰⵎⵖⵔⴰⴱⵉⵜ.
ⵔⴰⴷ ⵢⴰⵎⵓ ⴳ ⵓⵎⵏⵓⵇⵇⴰⵔ ⴰⴷ, ⵏⵏⴰ ⵉⵔⴰⵏ ⴰⴷ ⵢⵉⵍⵉ ⴰⵙⵙ ⵏ 23 ⵎⴰⵕⵚ ⵙⴳ 9 ⵏ ⵜⵉⴼⴰⵡⵜ, ⵉⵎⴷⵔⴰⵡⵏ ⴳ ⵓⵙⵏⵜⵉ ⴰⴷ ⴷ ⵜⵓⴳⵜ ⵏ ⵉⵎⵓⵣⴰⵢ ⴷ ⵉⵎⵙⵡⵓⵔⵉⵜⵏ ⴳ ⵢⵉⴳⵔ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵉⴳⵏⵙⴰⵙⵏ ⵏ ⵜⵏⴰⴼⵓⵜⵉⵏ ⵜⵉⵏⵎⵏⴰⴹⵉⵏ ⴷ ⵜⵉⵏⴰⵎⵎⴰⵙⵉⵏ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴷ ⵡⵉⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ.
