ⵉⵏⵏⴰⵢⵔ ⵢⴰⵜ ⵜⵉⵣⵉ ⵏ ⵜⵉⴽⴽⵉ ⵜⴰⴷⵍⵙⴰⵏⵜ ⴷ ⵓⵎⵢⴰⵡⴰⴹ ⴳⵔ ⵉⵖⵔⴼⴰⵏ
ⴰⵔ ⵜⵜⴳⴳⴰⵏⵜ ⵜⴼⵓⴳⵍⵉⵡⵉⵏ ⴷ ⵉⵎⵓⵙⵙⵓⵜⵏ ⵉⵎⴳⵔⵓⵜⵏ ⵢⴰⵜ ⵜⵉⵣⵉ ⵉⴼⵓⵍⴽⵉⵏ ⵏⵏⴰ ⴳ ⵣⵣⵔⴰⵢⵏⵜ ⵜⵓⵙⵏⵉⵡⵉⵏ ⴷ ⵉⵙⵡⵉⵏⴳⵉⵎⵏ ⴳⵔ ⵉⵖⵔⴼⴰⵏ; ⴽⵎⵍⵍⵉ ⴳⴰⵏⵜ ⴰⵡⴷ ⵢⴰⵏ ⵓⵙⵕⵥⵎ ⵙ ⵜⴱⴹⵉⵜ ⵏ ⵜⵎⴽⵜⵉⵜ ⴷ ⵓⵎⵣⵔⵓⵢ ⴳⵔ ⵎⵉⴷⴷⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴳⴰⵏⵜ ⵜⵉⵣⵉ ⵏ ⵜⴼⵓⴳⵍⴰ ⴷ ⵡⴰⴼⵓⵍⴽⵉ.
ⵉⵖ ⵜⴳⴰ ⵜⵉⵣⵉ ⴰⴷ ⵜⵉⵏ ⵜⵎⴽⵜⵉⵜ ⵏ ⵉⵎⵣⵡⵓⵔⴰ ⴷ ⵉⵥⵓⵕⴰⵏ ⴷⴰⵔ ⵡⵉⵍⵍⵉ ⵎⵇⵇⵓⵔⵏⵉⵏ, ⵀⴰ ⵏⵏ ⵜⴳⴰ ⵓⵍⴰ ⵢⴰⵏ ⵓⵣⵎⵣⵣⵓ ⵏ ⵜⵢⴰⴼⵓⵜ ⵉⴳⴳⵓⵜⵏ ⴷⴰⵔ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ, ⴰⵛⴽⵓ ⴰⵔ ⴳⵉⵙ ⵜⵜⵙⵙⵏⵏ ⵙ ⵡⴰⵜⵉⴳ ⵏ ⵓⴼⵔⴰⴳ ⵏ ⵡⴰⵢⴷⴰ. ⵓⵏⵛⴽ ⴰⴷ, ⴰⵔ ⵉⵙⵉⵎⵖⵓⵔ ⴰⵎⵢⴰⵡⴰⴹ ⴷ ⵜⵉⴽⴽⵉ ⵜⴰⴷⵍⵙⴰⵏⵜ ⴳⵔ ⵉⵖⵔⴼⴰⵏ, ⵎⴽⵍⵍⵉ ⵉⵜⵜⴰⵡⵙ ⴳ ⵜⵏⴽⵔⴰ ⵜⴰⵏⴰⵎⵓⵏⵜ ⴷ ⵜⴷⵍⵙⴰⵏⵜ.
ⵉⴳⴰ ⵓⵙⴼⵓⴳⵍⵓ ⵙ ⵢⵉⴹ ⵏ ⵉⵏⵏⴰⵢⵔ, 2969 ⵢⴰⵏ ⵡⴰⵏⴰⵡ ⵏ ⵜⵉⴽⴽⵉ ⵜⴰⴷⵍⵙⴰⵏⵜ ⵏⵏⴰ ⵉⵜⵜⵓⴱⴷⴰⵔⵏ ⴳ ⵓⴹⵕⵉⵚ ⴰⴷ. ⴰⵛⴽⵓ ⴷⵔⴰⵏ ⵉⵏⵓⵎⴰⴽ ⵉⴷⵍⵙⴰⵏⵏ ⴷ ⵉⵏⵟⵕⵓⴱⵓⵍⵊⵉⵏ ⵏⵏⴰ ⵢⵓⵙⵉ, ⵓⵔⴷ ⵖⴰⵙ ⴳ ⵍⵎⵖⵔⵉⴱ, ⵎⴰⵛ ⴳ ⵓⵎⵣⵔⵓⵢ ⵏ ⵉⵥⵥⵍⵎⴹ ⴰⴽⴽⵯ ⵏ ⵉⴼⵔⵉⵇⵢⴰ.
ⵏⵙⵜⵉ ⵉ ⵜⴰⴼⵓⴳⵍⴰ ⵙ ⵢⵉⴹ ⵏ ⵉⵏⵏⴰⵢⵔ ⴰⵙⴳⴳⵯⴰⵙ ⴰⴷ, ⴰⴷ ⵜⵥⵍⵉ ⵙ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ ⴰⴼⴰⴷ ⴰⴷ ⵙⵙⵏⵏ ⵙ ⵡⴰⵜⵉⴳ ⵏⵏⵙ ⵢⴰⵜⵜⵓⵢⵏ. ⵜⴰⴼⵓⴳⵍⴰ ⵏ ⵓⵙⴳⴳⵯⴰⵙ ⴰⴷ ⵜⴳⴰ ⵜⴰⵔⵣⵣⵉⴼⵜ ⵉ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ ⴰⴷ ⴰⵛⴽⵓ ⵉⵍⵍⴰ ⴼⵍⵍⴰⵖ ⴰⴷ ⴷ ⵏⵙⵙⴰⴳⴳⵯ ⵜⵉⵖⵎⵔⵉⵏ ⵙⵔⵙⵏ ⵉⵥⵍⵉⵏ.
ⵔⴰⴷ ⵉⵙⴼⵓⴳⵍⵓ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵢⵉⵏⵏⴰⵢⵔ ⴰⵙⴳⴳⵯⴰⵙ ⴰⴷ ⴳ ⵓⵙⴰⴳⵓⵔ ⵏⵏⵙ ⴰⵙⵙ ⵏ 14 ⵉⵏⵏⴰⵢⵔ 2019 ⴳ ⵜⵉⵙⵙ ⴽⵕⴰⴹⵜ ⵏ ⵜⵣⵣⵡⵉⵜ. ⴰⵙⴼⵓⴳⵍⵓ ⴰⴷ ⵔⴰⴷ ⵉⴳ ⵡⵉⵏ ⵜⴱⴹⵉⵜ ⵏ ⵉⵏⵓⵎⴰⴽ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⵏ ⵢⵉⵏⵏⴰⵢⵔ ⴷ ⵉⵏⴱⴳⵉⵡⵏ ⵏ ⵓⵙⵉⵏⴰⴳ, ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ ⴷ ⵉⵎⵥⵢⴰⵏⵏ ⵙ ⵢⴰⵜ ⵜⵖⴰⵔⴰⵙⵜ ⵉⴼⵓⵍⴽⵉⵏ.
