ⴰⴷⵓⵙⵜⵓⵔ
ⵜⴼⴽⴰ ⵜⵎⵏⴹⴰⵡⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵏ ⵓⵙⴳⴳⵯⴰⵙ ⵏ 2011 ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⴷⴷⴰⴷ ⴰⵎⴰⴷⴷⵓⴷ ⴳ ⵓⵖⵙⴷⵉⵙ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ. ⵜⴰⵎⵙⴰⵔⵜ ⴰⴷ ⵜⴳⴰ ⵜⴰⵎⵣⵔⴰⵢⵜ ⴰⵛⴽⵓ ⵜⵓⴽⵣ ⴰⴼⵔⴷⵉⵙ ⴰⵎⴰⵣⵉⵖ ⵏⵏⴰ ⵉⴳⴰⵏ ⴰⴼⴳⴳⴰⴳ , ⵜⵎⴰⴳⵉⵜ ⵜⴰⵏⴰⵎⵓⵔⵜ, ⵏⵏⴰ ⵙ ⵉⵍⴰⵇ ⴰⴷ ⴰⴽⵯ ⴱⵓⵔⵣⵏ ⵉⵎⵖⵔⴰⴱⵉⵢⵏ ⵙ ⵡⴰⵔ ⴰⵙⵜⴰⵢ.
ⴰⵎⴰⴳⵔⴰⴷ 5 ⵏ ⵜⵎⵏⴹⴰⵡⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ
ⵏ ⵓⵙⴳⴳⵯⴰⵙ ⵏ 2011
ⵜⴳⴰ ⵙⵓⵍ ⵜⵄⵕⴰⴱⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵓⵡⴰⵏⴽ.
ⵎⴽⵍⵍⵉ ⴷ ⵉⵇⵇⴰⵏ ⴰⵡⴰⵏⴽ ⴰⴷ ⵏⵏ ⵉⴳ ⵜⵓⴳⴳⴰⵙ ⵅⴼ ⵓⵃⵟⵟⵓ ⴷ ⵜⴳⵎⵉ ⵏⵏⵙ.
ⵜⴰⵎⴰⵣⵉⵖⵜ ⴰⵡⴷ ⵏⵜⵜⴰⵜ ⵜⴳⴰ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵓⵡⴰⵏⴽ, ⴰⵛⴽⵓ ⵏⵜⵜⴰⵜ ⴰⴷ ⵉⴳⴰⵏ ⴰⵢⴷⴰ ⵉⵎⴰⵏⵏ ⵏ ⵉⵎⵖⵔⴰⴱⵉⵏ ⴽⵔⴰ ⴳⴰⵏ.
ⵔⴰⴷ ⵉⵎⵎⴰⵍ ⵓⵙⵍⴳⵏ ⴰⵎⴰⴷⴷⴰⵙ ⵎⴰⵏⵉⴽ ⵙ ⵔⴰⴷ ⵜⵜⵡⴰⵙⵔⴰⵙ ⵜⵎⴰⴷⴷⵓⴷⵜ ⵏ ⵜⵎⴰⵣⵉⵖⵜ, ⴷ ⵜⵉⵎⴰⵎⴽⵉⵏ ⵏ ⵓⴽⵛⵛⵓⵎ ⵏⵏⵙ ⵙ ⵉⴳⵔ ⵏ ⵓⵙⵙⵍⵎⴷ ⴷ ⵉⴳⵔⴰⵏ ⵍⵍⵉ ⵙ ⴷ ⵉⵇⵇⴰⵏ ⴰⴷ ⵣⵡⴰⵔ ⵙⵔⵙⵏ ⵜⴽⵛⵎ, ⴰⴼⴰⴷ ⴰⴷ ⵜⵉⵥⴹⵉⵕ ⴰⴷ ⴰⴽⴽⵯ ⵜⵙⴰⵍⴰ ⵜⵉⵡⵓⵔⵉⵡⵉⵏ ⵏⵏⵙ ⵜⵉⵎⴰⴷⴷⵓⴷⵉⵏ ⴳ ⵎⴰ ⵔⴰⴷ ⴷ ⵢⴰⵛⴽ.
ⵔⴰⴷ ⵢⴰⵡⵣ ⵓⵡⴰⵏⴽ ⵅⴼ ⵜⵏⴽⵔⴰ ⵏ ⵜⵃⵙⵙⴰⵏⵉⵜ, ⴰⵛⴽⵓ ⵜⴳⴰ ⵢⴰⵏ ⵓⴳⵣⵣⵓⵎ ⵓⵔ ⵉⵟⵟⴰⵕⵏ ⴳ ⵜⵎⴰⴳⵉⵜ ⵜⴰⵎⴰⵙⵙⴰⵏⵜ ⵜⴰⵏⴰⵎⵓⵔⵜ. ⵎⴽⵍⵍⵉ ⴷ ⵉⵇⵇⴰⵏ ⴰⴷ ⵜⴰⵡⵣ ⵓⵍⴰ ⵅⴼ ⵓⵍⵎⵎⵓⴷ ⵏ ⵜⵓⵜⵍⴰⵢⵉⵏ ⵜⵉⴱⵕⵕⴰⵏⵉⵢⵉⵏ ⵍⵍⵉ ⴱⴰⵀⵀⵔⴰ ⵉⵍⵍⴰⵏ ⴳ ⵓⵎⴰⴹⴰⵍ, ⴰⵛⴽⵓ ⴳⴰⵏⵜ ⵉⵎⴰⵙⵙⵏ ⵏ ⵓⵏⵢⴰⵍⴽⴰⵎ ⴷ ⵓⵙⵉⴷⴼ ⵙ ⵓⵎⴰⴹⴰⵏ ⵏ ⵜⵓⵙⵙⵏⴰ, ⴳⵏⵜ ⵓⵍⴰ ⵉⵎⴰⵙⵙⵏ ⵏ ⵓⵏⵏⵓⵕⵥⵎ ⵅⴼ ⵜⵓⵙⵙⵏⵉⵡⵉⵏ ⴷ ⵜⵖⵔⵎⴰ ⵏ ⵜⵉⵣⵉ ⴰⴷ.
ⵉⵇⵇⴰⵏ ⴷ ⴰⴷ ⵉⵜⵜⵡⴰⵙⴽⴰⵔ ⵢⴰⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⵓⵙⵙⵏⴰ ⵜⴰⵏⴰⵎⵓⵔⵜ, ⵍⵍⵉ ⵔⴰⴷ ⵢⴰⵙⵉ ⴰⵃⵟⵟⵓ ⴷ ⵜⴳⵎⵉ ⵏ ⵙⵏⴰⵜ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ, ⵓⵍⴰ ⵓⴷⵎⴰⵡⵏ ⵏ ⵜⵓⵙⵙⵏⴰ ⵉⵍⵍⴰⵏ ⴳ ⵍⵎⵖⵔⵉⴱ, ⴰⵛⴽⵓ ⵏⵜⵜⵏⵜⵉ ⴰⴷ ⵉⴳⴰⵏ ⴰⵢⴷⴰ ⴰⵇⴱⵓⵕ ⴳⵏⵜ ⴰⵡⴷ ⴰⵙⵏⴼⵍⵓⵍ ⴰⵎⴰⵢⵏⵓ. ⵔⴰⴷ ⴰⴽⴽⵯ ⴳⵉⵙ ⵉⵍⵉⵏⵜ ⵜⵎⵔⵙⴰⵍ ⵍⵍⵉ ⵙⵡⵓⵔⵉⵏⵉⵏ ⴳ ⵉⴳⵔⴰⵏ ⴰⴷ. ⵔⴰⴷ ⵉⵙⵔⵙ ⵢⴰⵏ ⵓⵙⵍⴳⵏ ⴰⵎⴰⴷⴷⴰⵙ ⴰⵢⵏⵏⴰ ⵔⴰⴷ ⵉⵙⴰⵍⴰ ⴷ ⵜⵡⵓⵔⵉⵡⵉⵏ ⵏⵏⵙ ⴰⵡⴷ ⵎⴰ ⵔⴰⴷ ⴷⵉⴳⵙ ⵢⵉⵍⵉ ⴷ ⵜⵎⴰⵎⴽⵉⵏ ⵏ ⵜⵡⵓⵔⵉ ⵏⵏⵙ.
