ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵙⵎⵓⵜⵜⴳ ⵏ ⵉⵏⵖⵎⴰⵙⵏ ⵏ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵢⵜ ⵏ ⵜⵏⵖⵎⴰⵙⵜ
2013 ⵙⴳ ⵡⴰⵙⵙ ⵏ 15 ⴰⵔ 19 ⵉⴱⵔⵉⵔ 2013 ⴳ ⵓⵙⴽⵓ ⵏ ⵓⵙⵉⵏⴰⴳ, ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⴰⵏ ⵓⵙⵎⵓⵜⵜⴳ ⵉ ⵉⵏⵖⵎⴰⵙⵏ ⵏ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵢⵜ ⵏ ⵜⵏⵖⵎⴰⵙⵜ. ⴰⵡⵜⵜⴰⵙ ⵏ ⵜⵡⵓⵔⵉ ⴰⴷ ⵉⵜⵜⵓⴳⴰⵏ ⴳ ⵉⴳⵔ ⵏ ⵜⵎⵢⴰⵇⵇⴰⵏⵜ ⵉⵙⵎⴰⵏ ⴰⵙⵉⵏⴰⴳ ⴷ ⵜⵙⵏⵓⵔⴰⵢⵜ, ⴰⴷ ⵉⵖⵉⵢⵏ ⵉⵏⴰⵖⵎⴰⵙⵏ ⴰⴷ ⵜⵜⴰⵔⴰⵏ ⵉⵎⴰⴳⵔⴰⴷⵏ ⵏ ⵜⵙⵏⵓⵔⴰⵢⵜ ⵉⵙⵜⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⴰⵙⵎⵓⵜⵜⴳ ⴰⴷ ⵉⵟⵟⴼ ⵙ ⵜⵡⵏⵖⴰ ⵏ ⵜⴼⵉⵏⴰⵖ ⴷ ⵓⵙⵏⵎⴰⵔⵔⴰ ⴷ ⵜⵍⵖⴰⵙⵏⴰⵢⵜ ⴷ ⵓⵎⴰⵡⴰⵍ ⵏ ⵜⵎⴰⵣⵉⵖⵜ. ⵉⵎⵔⵣⴰ ⵏ ⵓⵙⵉⵏⴰⴳ ⵉⴱⴷⴷⴰⵏ ⵅⴼ ⵓⵙⵎⵓⵜⵜⴳ ⴰⴷ: ⵜⴰⵎⵏⵀⴰⵍⵜ ⵏ ⵡⴰⵎⵎⴰⵙ ⵄⵉⵛⴰ ⴱⵓⵃⵊⵕ, ⵅⴰⵍⵉⴷ ⴰⵏⵚⴰⵕ, ⵃⴰⵎⵉⴷ ⵙⵡⵉⴼⵉ, ⵄⴱⴷⵍⵍⴰ ⴱⵓⵎⴰⵍⴽ ⴷ ⵎⴼⵜⴰⵃⴰ ⵄⴰⵎⵔ, ⵉⵎⵉⵏⵉⴳⵏ ⴳ ⵡⴰⵎⵎⴰⵙ ⵏ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ.
ⴰⵙⵙ ⵏ ⴰⵙⵉⵎⵡⴰⵙ 19 ⵉⴱⵔⵉⵔ 2013, ⵜⵜⵓⴳⴰⵏⵜ ⵜⵙⴰⵡⵔⴰⵜⵉⵏ ⵜⵉⵎⵙⴽⵔⵜⵉⵏ ⵉⴼⴽⴰⵏ ⵉ ⵉⵏⴰⵖⵎⴰⵙⵏ ⵉⵎⴷⵢⴰⵜⵏ ⵏ ⵓⵙⵓⵖⵍ ⵏ ⵉⵎⴰⴳⵔⴰⴷⵏ ⴷ ⵉⵏⵖⵎⵉⵙⵏ ⵓⴳⵣⵉⵍⵏ ⵙⴳ ⵜⴰⵄⵕⴰⴱⵜ ⴷ ⵜⴼⵕⴰⵏⵚⵉⵙⵜ ⵖⵔ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵜⵙⵓⵍ ⵜⵡⵓⵔⵉ ⴰⴷ ⵓⵔ ⵜⴼⵓⴽⴽⵉ, ⴰⵛⴽⵓ ⴰⵙⵉⵏⴰⴳ ⵉⵙⵓⵍ ⴰⴷ ⵜⵜ ⵉⴹⴼⵓⵕ ⵃⵎⴰ ⵉⵎⴰⵖⵏⴰⵙⵏ ⴰⴷ ⴰⴽⵣⵏ ⵓⴳⴰⵔ ⵙⵙⴳⵎⵉⵏ ⵜⵉⵣⵎⵎⴰⵔ ⵏⵏⵙⵏ ⴳ ⵉⴳⵔ ⵏ ⵜⵉⵔⵔⴰ ⵉⵥⵍⵉⵏ ⵙ ⵜⵏⵖⵎⴰⵙⵜ.
ⴳ ⵜⵢⵉⵔⴰ ⵏ ⵓⵙⵎⵓⵜⵜⴳ ⴰⴷ, ⴰⵙⵙ ⵏ ⵡⴰⵙⵉⵎⵡⴰⵙ 03 ⵎⴰⵢⵓⵢⵓ 2013, ⵜⵜⵓⴼⴽⴰⵏⵜ ⵜⵏⵉⴳⵉⵜⵉⵏ ⵉ ⵉⵏⵖⵎⴰⵙⵏ ⵏ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵢⵜ ⵏ ⵜⵏⵖⵎⴰⵙⵜ : ⵜⴰⵎⵣⵡⴰⵔⵓⵜ ⵉⴼⴽⴰ ⵜⵜ ⵓⵏⴱⴷⴰⴷ ⵏ ⵓⵙⵉⵏⴰⴳ ⵉ ⵎⴰⵙⵙⴰ ⴽⴰⵡⵜⴰⵕ ⴰⴷⵖⵉⵔⵏⵉ, ⵜⵉⵙⵙ ⵙⵏⴰⵜ ⵉⴼⴽⴰ ⵜⵜ ⵎⴰⵙⵙ ⵎⵓⵍⵉⵎ ⵍⵄⵕⵓⵚⵉ ⴰⵎⴰⵙⴰⵢ ⴳ ⵜⵙⵏⵓⵔⴰⵢⵜ ⵉ ⵎⵚⵟⴰⴼⴰ ⵙⴳⵏⴼⵍ, ⵜⵉⵙⵙ ⴽⵕⴰⴹⵜ ⵉⴼⴽⴰ ⵜⵜ ⵓⵎⴰⵔⵓ ⴰⵎⴰⵜⵓ ⵏ ⵓⵙⵉⵏⴰⴳ ⵉ ⵡⵏⵖⵎⴰⵙ ⴱⵏⵃⵎⵎⵓ ⴱⵕⴰⵀⵉⵎ.
ⴷⴼⴼⵉⵔ ⵏ ⵜⴳⵓⵔⵉ ⵏ ⵜⵏⵎⵀⴰⵍⵜ ⵎⴰⵙⵙⴰ ⵄⵉⵛⴰ ⴱⵓⵃⵊⵕ ⵉⵙⴰⵡⵍⵏ ⵅⴼ ⵓⵙⵎⵓⵜⵜⴳ ⴷ ⵉⵎⵔⵣⴰ ⵏⵏⴰ ⵉⴱⴷⴷⴰⵏ ⵖⵉⴼⵙ ⴷ ⵜⵎⴰⵟⵟⴰⴼⵜ ⵉⵛⵏⴰⵏ ⵏ ⵜⵡⵓⵔⵉ ⴰⴷ, ⵉⵙⴰⵡⵍ ⵓⵏⴱⴷⴰⴷ ⵏ ⵓⵙⵉⵏⴰⴳ. ⵉⵏⵏⴰ ⵉⵙ ⴰⵙⵎⵓⵜⵜⴳ ⴰⴷ ⵉⴼⵓⵍⴽⵉ, ⵉⵍⴰ ⴰⵜⵉⴳ ⴰⵔ ⵉⵙⵙⵉⵔⵉⵎ ⴰⴷ ⵉⵜⵜⵓⵙⴱⵓⵖⵍⵓ ⵓⵎⵢⴰⵇⵇⴰⵏ ⵉⵍⵍⴰⵏ ⵏⴳⵔ ⵏ ⵜⵙⵏⵓⵔⴰⵢⵜ ⴷ ⵓⵙⵉⵏⴰⴳ. ⴳ ⵜⴳⵓⵔⵉ ⵏⵏⵙ, ⵎⴰⵙⵙ ⵍⵄⵕⵓⵚⵉ, ⵉⵙⵏⴰⵎⵎⵔ ⴰⵙⵉⵏⴰⴳ ⴷ ⵉⵎⵔⵣⴰ ⵉⴱⴷⴷⴰⵏ ⵅⴼ ⵓⵙⵎⵓⵜⵜⴳ. ⵉⵔⵏⵓ ⵉⵏⵏⴰ ⵉⵙ ⴰⵎⵓⵙⵙⵓ ⴰⴷ ⵉⵙⵓⵍ ⴰⴷ ⵉⵎⵖⵓⵔ ⵃⵎⴰ ⴰⴷ ⵜⴰⵡⵙ ⵜⵙⵏⵓⵔⴰⵢⵜ ⵉ ⵓⵣⵓⴳⴳⵣ ⵏ ⵓⵙⴷⴻⴷⵉ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
