ⴰⵙⴼⵓⴳⵍⵓ ⵏ ⵓⵙⴳⴳⵯⴰⵙ ⴰⵎⴰⵣⵉⵖ
ⴰⵙⴼⵓⴳⵍⵓ ⵏ ⵓⵙⴳⴳⵯⴰⵙ ⴰⵎⴰⵣⵉⵖ
ⵙ ⵍⵎⵏⴷ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ, ⵉⵎⵏⴰⵡⴰⵢⵏ ⴰⵙⴳⴳⵯⴰⵙ ⴰⴷ ⴷ 2960, ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵙⵙ ⵏ 15 ⵉⵏⵏⴰⵢⵔ 2010, ⵙⴳ ⵜⵉⵙⵙ ⴽⵕⴰⴹⵜ ⴷ ⵓⵣⴳⵏ ⵏ ⵜⴷⴳⴳⵯⴰⵜ, ⵢⴰⵏ ⵉⵡⵉⵣ ⴰⴷⵍⵙⴰⵏ ⴷ ⵡⵉⵏ ⵓⵎⵎⴷⵔⵣ. ⵉⵙⵡⵓⵔⵔⵉ ⵓⵙⵉⵏⴰⴳ ⴰⴼⴰⴷ ⵉⴳ ⵓⵏⵎⵓⵇⵇⴰⵔ ⴰ ⵢⴰⵜ ⵜⵎⵍⴷⴰ ⵏⵏⴰ ⵔⴰⴷ ⵏⵙⵙⴽⵜⵉ ⴰⵏⵙⴰⵢ ⵏ ⵉⵏⵏⴰⵢⵔ ⵉⵜⵜⵉⵍⵉⵏ ⴳ ⵜⵙⴳⴳⵉⵡⵉⵏ ⴰⴽⴽⵯ ⵏ ⵜⵎⴰⵣⵉⵔⵜ, ⵉⴷⵔⵓ ⴳⵉⵙ ⵜⵉⵔⴰⵎ ⵏⵏⴰ ⴳⵉⵙ ⵉⵜⵜⵓⵙⵎⴰⵔⵏ.
ⵉⴳⴰ ⵓⵙⴳⴳⵯⴰⵙ ⴰⵎⴰⵣⵉⵖ, ⵉⵜⵜⵓⵙⵙⴰⵏ ⵙ ⵉⵏⵏⴰⵢⵔ ⵏⵖ ⵉⴹ ⵏ ⵓⵙⴳⴳⵯⴰⵙ ⵏⵖ ⵃⴰⴳⵓⵣⴰ » ⵢⴰⵏ ⵓⵏⵙⴰⵢ ⴰⵇⴱⵓⵔ ⵏ ⵜⴼⵔⵉⵇⵜ ⵏ ⵉⵥⵍⵎⴹ, ⵉⴳ ⵢⴰⵜ ⵜⴼⵔⴽⴰ ⵜⵉⵏⵜⵜⵉⵜ ⴳ ⵜⵙⵎⵍⵓⵙⵙⴰⵏⵜ ⵜⴽⵔⵣⴰⵏⵜ ⵉⵜⵜⵓⵙⵙⴰⵏⵏ ⵙ ⵓⵙⴱⴷⴷ ⵏ ⴽⵔⴰ ⵏ ⵢⵉⵏⵙⴰⵢⵏ ⴷ ⵓⵙⵎⴰⵔ ⵏ ⵜⵉⵔⴰⵎ ⵥⵍⵉⵏ ⴷ ⵜⵉⴽⴽⵉ ⵏ ⵉⵕⴰⵥⴰⵖⵏ ⴷ ⵓⵎⵎⵣⵔⴰⵢ ⴷ ⴽⵔⴰ ⵏ ⵜⴳⴷⴰⵍⵉⵏ.
ⵍⵍⵉⴳ ⴷ ⵉⵍⵓⵍⴰ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ, ⵉⴳⴰ ⵉⴹ ⵏ ⵉⵏⵏⴰⵢⵔ ⴳ ⵢⴰⵏ ⵎⵏⵏⴰⵡ ⵏ ⵉⵏⵙⴰⵢ ⵉⴽⵛⵎⵏ ⵜⴰⴽⴰⵍⴰ ⵏ ⵜⴳⵎⵉ ⵜⴰⵏⴰⵎⵓⵏⵜ ⵏ ⵜⵎⴰⴳⵉⵜ ⵜⴰⴷⵍⵙⴰⵏⵜ ⵜⴰⵎⴰⵣⵉⵖⵜ. ⵎⴽⴰⴷ ⴰⴼ ⵉⵜⵜⵢⴰⵡⵙⴰⵜⵢ ⵓⵙⴳⴳⵯⴰⵙ ⵏ 950 ⵏⴷⵉ ⵜⴰⵍⴰⵍⵉⵜ ⵏ ⵍⵎⴰⵙⵉⵃ ⴰⴷ ⵉⵙ ⵉⵜⵜⵓⵙⵏⵜⵉ ⵓⵙⴳⴳⵯⴰⵙ ⴰⵎⴰⵣⵉⵖ, ⴰⵛⴽⵓ ⴰⵙⴳⴳⵯⴰⵙ ⴰ ⴰⴳ ⵢⵓⵎⵥ ⵓⵎⴰⵣⵉⵖ ⵛⵉⵛⵓⵏⵖ ⵜⴰⵏⴱⴰⴹⵜ ⴳ ⵎⵉⵚⵕ ⵜⴰⴼⵔⵄⵓⵏⵜ.
ⵎⴽⵍⵍⵉ ⵉⴳⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⴰⵜ ⵜⵎⵔⵙⵍⵜ ⵜⴰⴳⴷⵓⴷⴰⵏⵜ ⵢⵓⵙⵉⵏ ⵜⴰⵎⴰⵙⴰⵢⵜ ⵏ ⵜⴳⵎⵉ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴽⵛⵎ ⵜⴰⴷⵉⵏⴰⵎⵉⵢⵜ ⴰⴷ ⴰⵔ ⵉⵙⴼⵓⴳⵓⵍ ⴰⵡⴷ ⵏⵜⵜⴰⵏ ⵜⴰⴼⵓⴳⵍⴰ ⴰⴷ ⵉⵜⵜⴰⵡⵙⵏ ⴳ ⵓⵙⵙⵉⵎⵖⵓⵔ ⵏ ⵜⵎⴽⵜⵉⵜ ⵜⴰⵏⴰⴳⵔⴰⵡⵜ ⴷ ⵓⵎⵣⵔⵓⵢ ⴰⵏⴰⵎⵓⵔ.
ⴰⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ ⵉⵖⵓⴷⴰⵏ, ⵉ ⵉⵎⴰⵙⴰⵢⵏ ⴷ ⵜⵎⴰⵙⴰⵢⵉⵏ, ⵉ ⵉ ⵉⵎⵙⵡⵓⵔⴰ ⴷ ⵜⵎⵙⵡⵓⵔⴰ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.