ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵅⴼ: "ⵙⴳ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵖⵔ ⵜⵓⵜⵍⴰⵢⵜ ⵏ ⵜⵉⵏⵎⵍ"

ⵉⴳⴰ ⵓⵙⵙⵍⵎⴷ ⴷ ⵓⵍⵎⵎⵓⴷ ⵏ ⵜⵓⵜⵍⴰⵢⵉⵏ ⵙ ⵜⵎⴰⵜⴰⵢⵜ, ⴷ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵙ ⵓⵙⵉⵍⴰ, ⵜⴰⵎⵙⴰⵔⵜ ⵉⵍⵍⴰⵏ ⴳ ⵜⵓⵥⵥⵓⵎⵜ ⵏ ⵜⵏⴳⵔⴰⵡⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⵜⴳⴰ ⵜⵖⴰⵡⵙⴰ ⵏ ⵜⵓⵜⵍⴰⵢⵜ ⵢⴰⵏ ⴳ ⵉⵙⵔⴰⴳⵏ ⵏⵖ ⵜⵉⵎⵏⵜⵉⵍⵉⵏ ⵉⵥⵍⵉⵏ ⵙ ⵓⵙⵙⴼⵔⵓ ⵏ ⵜⵓⵎⴰⵏⵜ ⵏ ⵜⵡⴰⵖⵉⵜ ⵢⴰⵖⵏ ⵜⴰⵏⴳⵔⴰⵡⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵜⵎⴰⵣⵉⵔⵜ ⵏ ⵍⵎⵖⵔⵉⴱ. ⴰⵔ ⵉⵜⵜⵉⵏⵉ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ ⴳ ⵢⴰⵜ ⴳ ⵜⵉⵏⴰⴹ ⵏⵏⵙ ⵎⴰⵙ ⵜⴳⴰ ⵜⵎⵓⴽⵔⵉⵙⵜ ⵏ ⵓⵙⵍⵎⴷ ⴷ ⵓⵍⵎⵎⵓⴷ ⵏ ⵜⵓⵜⵍⴰⵢⵉⵏ ⵢⴰⵜ ⵙⴳ ⵜⵎⵙⴰⵔⵉⵏ ⵜⵉⵎⵏⴰⴷⵉⵏ ⵏ ⵜⵏⴳⵔⴰⵡⵜ ⵜⴰⵙⴳⴰⵎⴰⵏⵜ ⵢⴰⵖⵓⵍⵏ ⵙ ⵓⵙⵔⵉⴷ ⵅⴼ ⵜⵔⴰⵔⵓⵜ ⵏ ⵓⴳⵏⵙ ⴷ ⴱⵕⵕⴰ.  ⴰⵔ ⵜⵙⴰⵡⴰⵍ ⵜⵏⴰⴹⵜ ⵅⴼ ⵡⵓⴳⴳⴰⵔ ⵏ ⵓⵢⴰ, ⴰⵔ ⵜⵜⵉⵏⵉ ⵎⴰⵙ ⵉⴳⴰ « ⵓⵏⵙⴱⴹ ⵏ ⵜⵣⵎⵎⴰⵔ ⵏ ⵜⵓⵜⵍⴰⵢⵜ ⴷ ⵓⵙⵙⵍⵎⴷ ⵏⵏⵙ ⵉⵥⵉⵍⵏ ⵢⴰⵏ ⵓⵙⴳⴰⵔ ⴰⵙⴳⵓⵎⴰⵏ ⵉ ⵓⵙⴰⴳⴳⵯ  ⵉ ⵢⵉⴽⵙⵉⵏ ⵏ ⵓⵣⵎⵣⵣⵓ…ⴷ ⵜⵉⴳⵎⵉ ⵉⵙⵎⴷⵏ ⴳ ⵉⵎⵏⵉⴷ ⴷ ⵉⵙⵡⵉⵔⵏ ⵏⵏⵙ».

ⵙ ⵎⴰⴷ ⵉⵥⵍⵉⵏ ⵙ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⴰⵔ ⵜⵜⵉⵏⵉⵏ ⵎⵏⵏⴰⵡ ⵏ ⵉⵙⴼⵙⵉⵜⵏ ⴷ ⵜⵢⴰⴼⵓⵜⵉⵏ ⵎⴰⵙ ⵉⵍⴰ ⵓⵍⵎⵎⵓⴷ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴰⵜⵉⴳ ⴰⵅⴰⵜⴰⵔ ⵣⵉⴽⴽ ⵏ ⵍⵃⴰⵍ ⴷⴰⵜ ⵏ ⵓⵙⵍⵎⴷ ⵏ ⵜⵓⵜⵍⴰⵢⵉⵏ ⵢⴰⴹⵏⵉⵏ.  ⴰⵔ ⵜⵜⵉⵏⵉⵏ ⴰⵡⴷ ⵎⴰⵙ ⴷ ⵜⵉⵏⵎⴰⵍ ⵜⵉⵎⴰⴹⵍⴰⵏⵉⵏ ⵉⵜⵜⴳⴰⵏ ⵉⵖⴰⵡⴰⵙⵏ ⵏ ⵓⵙⵍⵎⴷ ⴷ ⵓⵍⵎⵎⵓⴷ ⵏ ⵜⵓⵜⵍⴰⵢⵉⵏ ⴱⵍⴰ ⴰⵙⵉⵜⵜⴳ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴰⵔ ⵉⵜⵜⵓⵖⵓⵍ ⵙ ⵓⵣⴷⵉⵔ ⵅⴼ ⵜⴰⵔⵡⴰ. ⵎⵏⵏⴰⵡⵜ ⵏ ⵉⵙⵏⵓⴱⴱⵓⵛⵏ ⴷ ⵜⵖⵓⵔⵉⵡⵉⵏ ⴷ ⵢⵉⵡⵉⵏ ⵅⴼ ⵉⵃⵏⵊⵉⵔⵏ, ⴰⵔ ⵜⵜⵉⵏⵉⵏ ⵎⴰⵙ ⴷⴰ ⵜⵜⴰⵡⵙ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴳ ⵉⵍⵎⵎⵓⴷⵏ ⵏ ⵜⵓⵜⵍⴰⵢⵉⵏ ⵢⴰⴹⵏ ⴷ ⵜⵓⵙⵙⵏⴰ ⵙ ⵓⵎⴰⵜⴰ ⵖⵓⵔ ⵜⴰⵣⵣⴰⵏⵉⵏ, ⴰⵢⴰ ⴰⵢⴷ ⵢⵓⵊⵊⴰⵏ ⵍⵢⵓⵏⵉⵙⴽⵓ ⴰⴷ ⵜⴰⵡⵙ ⴳ ⵉⵍⵎⵎⵓⴷⵏ ⵏ ⵜⴰⵣⵣⴰⵏⵉⵏ ⵙ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⴰⵛⴽⵓ ⴰⵔ ⴷⴰⵔⵙⵏ ⵜⵙⴷⵓⵙ ⵜⴰⵙⴳⴰ ⵜⴰⵡⵙⵙⴰⵏⵜ. ⵙ ⵜⵓⴳⴷⵓⵜ ⵏ ⵎⴰⵏⴰⵢⴰ, ⵜⴰⵣⵣⴰⵏⵉⵏ ⵉⵜⵜⵍⵎⴰⴷⵏ ⴳ ⵓⵙⵡⵉⵔ ⴰⵎⵏⵣⵓ ⵙ ⵜⵓⵜⵍⴰⵢⵜ ⵓⵔ ⵉⴳⵉⵏ ⵜⴰⵢⵎⵎⴰⵜ ⴰⵔ ⵜⵜⵍⵎⵎⴰⴹ ⵜⵓⵜⵍⴰⵢⵜ ⵏⵖⴷ ⴰⵔ ⵜⵊⵍⵍⵓ ⴷⴰⵔⵙⵏ.

ⵙ ⵜⵎⵏⵜⵉⵍⵜ ⴰⴷ, ⴰⵔ ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⴰⵏ ⵓⵎⵙⴰⴳⴰⵔ ⴰⴳⵔⴰⵖⵍⴰⵏ ⵅⴼ: «ⵙⴳ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵖⵔ ⵜⵓⵜⵍⴰⵢⵜ ⵏ ⵜⵉⵏⵎⵍ», ⵓⵙⵙⴰⵏ ⵏ 14 ⴷ15 ⵏⵓⵡⴰⵏⴱⵉⵔ 2016.

ⵉⴳⴰ ⵓⵎⵙⴰⴳⴰⵔ ⴰⴷ ⵢⴰⵜ ⵜⵉⵣⵉ ⵏ ⵓⵙⵏⴼⵍ ⵏ ⵉⵙⵡⵉⵏⴳⵉⵎⵏ ⴷ ⵢⵉⵔⵉⵎⵏ ⵉⵣⴷⵉⵏ ⵙ ⵜⵓⵜⵍⴰⵢⵉⵏ ⵜⵉⵢⵎⵎⴰⵜⵉⵏ ⴷ ⵓⵙⵍⵎⴷ ⵉⵙⵏⵜ ⵉⵜⵜⵡⴰⴳⴳⵏ  ⴳ ⵢⴰⵏ ⵓⵎⵏⴰⴹ ⵉⴳⴰⵏ ⵎⴰⴳⵜ ⵉⵍⵙ. ⵔⴰⴷ ⵉⵍⵉⵏⵜ ⵜⵖⵓⵔⵉⵡⵉⵏ ⵏ ⵉⵎⴷⵢⴰⵜⵏ ⵉⵙⴰⵡⴰⵍⵏ ⵅⴼ ⵜⵓⵜⵍⴰⵢⵉⵏ, ⵉⵜⵜⵡⴰⴼⴽ ⵢⴰⵏ ⵡⴰⵜⵉⴳ ⴷ ⴰⵎⵇⵇⵔⴰⵏ ⵉ ⵓⵙⵍⵎⴷ ⴷ ⵓⵍⵎⵎⵓⴷ ⵏ ⵜⵎⴰⵣⵉⵖⵜ. ⵔⴰⴷ ⵢⵉⵍⵉ ⴳ ⵓⵎⵙⴰⴳⴰⵔ ⴰⴷ ⴰⵎⵔⴰⵔⴰ ⵏ ⵡⴰⵡⴰⵍ ⵅⴼ ⵉⵙⵇⵙⵉⵜⵏ ⵏ ⵓⵔⵣⵣⵓ ⵉⵣⴷⵉⵏ ⵙ ⵓⵙⵍⵎⴷ ⴷ ⵓⵍⵎⵎⵓⴷ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵣⵓⵏ ⴷ:

• ⵜⴰⵙⵔⵜⵉⵜ ⵜⴰⵙⵏⵉⵍⵙⵜ ⵉⵥⵍⵉⵏ ⵙ ⵓⵙⴳⵎⵉ ;

• ⴰⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴳ ⵜⵓⵇⵇⵏⴰ ⵏⵏⵙ ⵖⵔ ⵓⵙⵡⵓⴷⴷⵓ ⵏ ⵓⵏⵓⵃⵢⵓ ;

• ⴰⵜⵡⴰⵍ ⴰⴱⵉⴷⴰⴳⵓⵊⵉ ;

• ⵜⵉⵎⴰⴷⴷⴰⵙⵉⵏ ⴷ ⵜⴱⵔⵉⴷⵉⵏ ⵜⵉⴷⵉⴷⴰⴽⵜⵉⵢⵉⵏ ;

• ⴰⵙⵎⵓⵜⵜⴳ ⵏ ⵉⵙⵍⵎⴰⴷⵏ ;

• ⴰⵃⵉⵢⵢⵍ ⴷ ⵓⵙⵓⴼⵖ ⵏ ⵉⵎⴰⵙⵙⵏ ⵉⴱⵉⴷⴰⴳⵓⵊⵉⵏ (ⴰⵏⵏⴰⵍⵏ ⵉⴼⵔⴽⵓⴽⵏ  ⴷ ⵉⵎⵓⵟⵟⵓⵏⵏ)

• ⴰⵙⵜⴰⵍ ⵏ ⵉⵎⵄⵉⵏⵏ  ⵉⵏⵎⵍⴰⵏ ;                

• ⴰⵙⵜⴰⵍⵏ ⵉⵏⴳⵔⴰⵡⵏ ⵉⵙⴳⵎⴰⵏⵏ ⴳ ⵓⵎⵏⴰⴷ ⵏⵏⵙ ⴰⵙⵏⵉⵍⵙ.