ⴰⵙⴼⵓⴳⵍⵓ ⵙ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ 2967

ⴰⵙⵙⵏⵥⵓ

ⵎⵇⵇⴰⵔ ⵉⵍⵍⴰ ⵓⵏⵖⵓⴱⵓ ⵏ ⵡⴰⵟⵟⴰⵚ ⵏ ⵜⵎⵙⴽⴰⵔⵉⵏ ⵜⵉⴷⵍⵙⴰⵏⵉⵏ ⴷ ⵜⵏⴰⵥⵓⵕⵉⵏ ⵉⵍⴰⵏ ⴰⵜⵉⴳ ⴰⴳⵯⵏⵙ ⵏ ⵜⴳⵔⴰⵡⵉⵏ ⵜⵉⴷⵖⵔⴰⵏⵉⵏ, ⵍⵍⴰⵏⵜ ⵜⵎⵙⴽⴰⵔⵉⵏ ⵏⵏⵉⴹⵏ ⵙⵓⵍⵏⵜ ⴷⴷⵔⵏⵜ ⴰⵛⴽⵓ ⴽⵛⵎⵏⵜ ⴰⴳⵯⵏⵙ ⵏ ⵜⵏⴽⵔⴰ ⵜⴰⴷⵍⵙⴰⵏⵜ, ⵜⵜⵓⴼⴽⴰⵙⵏⵜ ⵜⵡⵓⵔⵉⵡⵉⵏ ⴷ ⵉⵏⴰⵎⴽⵏ ⵉⵎⴰⵢⵏⵓⵜⵏ. ⵙ ⵓⵎⴷⵢⴰ, ⵉⵍⵍⴰ ⵓⵙⴼⵓⴳⵍⵓ ⵙ « ⵉⴹ ⵏ ⵉⵏⵏⴰⵢⵔ». ⵜⴰⵎⵖⵔⴰ ⴰⴷ ⵉⵟⵟⴼⵏ ⵙ ⵜⴼⵍⵍⴰⵃⵜ, ⵜⴰⵖⵓⵍ ⴰⵙⵙ ⴰ ⵜⴳⴰ ⵢⴰⵜ ⵜⵉⵍⴰⵡⵜ ⵜⴰⵏⴰⵎⵓⵏⵜ ⴷ ⵜⴰⵏⵖⵎⴰⵙⵜ. ⴰⵔ ⵜⵜ ⵙⴼⵓⴳⵍⵓⵏ ⵉⵎⵙⴽⴰⵔⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴷ ⵜⵎⵔⵙⴰⵍⵉⵏ ⵜⵉⵎⴰⴷⴷⵓⴷⵉⵏ. ⵏⵣⵎⵔ ⴰⴷ ⵏⵉⵏⵉ ⵉⵙ ⵜⴳⴰ ⴰⵡⴷ ⵢⴰⵏ ⵓⵙⵓⵜⵔ ⴰⵙⵔⵜⴰⵏ ⵉⵔⴰⵏ ⴰⴷ ⵜⴰⵖⵓⵍ ⴰⴷ ⵜⴳ ⵜⴰⵎⵖⵔⴰ ⵜⴰⵏⴰⵎⵓⵔⵜ ⴷ ⵢⴰⵏ ⵡⴰⵙⵙ ⵡⴰⵔ ⵜⴰⵡⵓⵔⵉ, ⵙⴳ ⵓⵙⵎⵔⵙⵍ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵙⴳⴳⵯⴰⵙ ⵏ 2001 ⴷ ⵓⵙⵓⴷⴻⴷ ⵏⵏⵙ ⴳ 2011. ⵅⴼ ⵓⵢⴰⴷ ⴰⵙ ⵉⵍⴰⵇ, ⴰⴷⴷⴰⴳ ⵏⴽⵜⵉ ⴰⵎⵣⵣⵓ ⴰⴷ, ⴰⴷ ⵏⴱⴹⵓ ⵏⴳⵔ ⵏ ⵍⴰⵚⵍ ⵏⵏⵙ ⵉⵥⵍⵉⵏ ⵙ ⵜⴼⵍⵍⴰⵃⵜ ⴷ ⵡⵓⴷⵎ ⵏⵏⵙ ⴰⵏⴰⵎⵓⵏ ⵉⵜⵜⵓⵚⴽⴰⵏ : ⴰⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ.

ⵉⴳⴰ ⵉⵏⵏⴰⵢⵔ ⵢⴰⵜ ⵜⵎⵢⵓⵔⵜ ⵉⵟⵟⴼⵏ ⵙ ⴰⵙⵎⵍⵓⵙⵙⴰⵏ ⵏ ⵜⴼⵍⵍⴰⵃⵜ ⴷ ⵜⵡⵓⵔⵉⵡⵉⵏ ⵏⵏⵙ. ⵉⵡⴷⴰⵏ ⴰⵔ ⵙⴼⵓⴳⵍⵓⵏ ⵉⵏⵏⴰⵢⵔ ⴳ ⵓⵎⴰⵜⴰ ⵏ ⵜⵎⵏⴰⴹⵉⵏ , ⴳ ⵍⵎⵖⵔⵉⴱ ⴷ ⴰⴽⴰ ⵜⵉⵎⵓⵔⴰ ⵏ ⴰⴼⵔⵉⵇⵢⴰ ⵏ ⵥⵥⵍⵎⴹ, ⵙⴳ ⵣⵉⴽ. ⵉⵟⵟⴼ ⵡⴰⵙⵙ ⴰⴷ ⵎⵏⵏⴰⵡ ⵏ ⵉⵙⵎⴰⵡⵏ ⴳ ⴽⵓ ⵜⴰⵎⵏⴰⴹⵜ : « ⵉⴹ ⵏ ⵓⵙⴳⴳⵯⴰⵙ », « ⵉⴹ ⵏ ⵉⵏⵏⴰⵢⵔ », « ⵃⴰⴳⵓⵣⴰ », « ⵜⴰⴳⴳⵯⵍⴰ ⵏ ⵉⵏⵏⴰⵢⵔ » ⴷ « ⵜⴰⴱⴱⵓⵔⵜ ⵏ ⵓⵙⴳⴳⵯⴰⵙ» ⵖⵓⵔ ⵉⵇⴱⴰⵢⵍⵉⵢⵏ. ⴰⵙⴼⵓⴳⵍⵓ ⴰⵔ ⵉⵜⵜⵓⵙⴽⴰⵔ ⴰⴳⵯⵏⵙ ⵏ ⵜⴳⵯⵎⵎⴰ : ⴰⵔ ⵜⵜⵉⵍⵉⵏⵜ ⵜⵎⵜⵜⵛⴰ ⵉⵙⵜⵉⵏ (ⵙⴽⵙⵓ, ⵜⴰⴳⵯⵍⵍⴰ…), ⵜⵜⵓⴳⵏⵜ ⴽⵔⴰ ⵏ ⵜⵎⵢⵓⵔⵉⵏ ⵥⵓⵏⴷ : ⵜⵉⵖⵔⵉ ⵏ ⵓⵣⵔⵔⵓⵢ ⵏⵖ ⴰⴳⴷⴰⵍ ⵏ ⴽⵔⴰ ⵏ ⵜⵖⴰⵡⵙⵉⵡⵉⵏ ⵎⵉ ⴷⴰⵔ ⵉⵏⴰⵎⴽⵏ ⵉⴱⴹⴰⵏ. ⴰⵙⴼⵓⴳⵍⵓ ⵏ ⵉⵏⵏⴰⵢⵔ ⵉⴳⴰ ⴰⵇⴱⵓⵔ ⴷ ⵜⵎⵢⵓⵔⵉⵏ ⵥⴰⵕⵙ ⵉⵟⵟⴼⵏ ⵙⵜⵉⵏⵜ ⵙⴳ ⵜⵎⵏⴰⴹⵜ ⵖⵔ ⵜⴰⵢⴹ.

ⵎⴰⵛⴰ ⴰⵙⴼⵓⴼⵓⴳⵓ ⵉⵜⵜⵓⴳⴰⵏ ⴰⵙⵙ ⴰ ⵉ ⵓⵙⴳⴳⵯⴰⵙ ⴰⵎⴰⵣⵉⵖ ⵉⴳⴰ ⴰⵎⴰⵢⵏⵓ ⵉⴽⵛⵎ ⴰⴳⵯⵏⵙ ⵏ ⵜⵣⵉⴳⵣⵜ ⵏ ⵓⵚⴽⵓ ⵏ ⵜⵎⴰⴳⵉⵜ, ⵏⵏⴰ ⵢⵓⵙⵉ ⵓⵎⵓⵙⵙⵓ ⴰⵎⴰⵣⵉⵖ ⵉⴳⴰⵏ ⴰⵎⵙⴽⴰⵔ, ⵉⵔⴰⵏ, ⵥⵓⵏⴷ ⵏⵜⵜⴰ ⵥⵓⵏⴷ ⵉⵎⵓⵙⵙⵓⵜⵏ ⵏ ⵓⵚⴽⵓ ⵏ ⵜⵎⴰⴳⵉⵜⵉⵏ ⵜⵉⵎⴳⵔⴰ, ⴰⴷ ⵉⴼⴽ ⵢⴰⵏ ⵡⵓⴷⵎ ⴰⵎⴰⵢⵏⵓ ⵉ ⴽⵔⴰ ⵏ ⵜⵎⵢⵓⵔⵉⵏ ⵜⵉⵎⵃⴹⴰ, ⵃⵎⴰ ⴰⴷ ⴰⵖⵓⵍⵏⵜ ⴰⴷ ⴳⵉⵏⵜ ⵜⵉⴼⵉⵔⴰⵙ ⵏ ⵜⵎⴰⴳⵉⵜ. ⵉⵍⵍⴰ ⵓⵙⴼⵓⴳⵍⵓ ⵏ ⵉⴹ ⵏ ⵉⵏⵏⴰⵢⵔ ⴳ ⵍⵎⵖⵔⵉⴱ ⴷ ⵍⵉⴱⵢⴰ ⴷ ⴷⴷⵣⴰⵢⵔ. ⴰⵔ ⵜ ⵙⴼⵓⴳⵍⵓⵏ ⴰⵡⴷ ⵉⵎⵣⴷⴰⵖ ⵏ ⴱⵕⵕⴰ ⵙⴳ ⵉⵙⴳⴳⵯⴰⵙⵏ ⵏ 1970 ⵏⵏⴰ ⵉⵏⵏⵓⵍⴰⵏ ⴰⴼⴰⴼⴰ ⵉⵟⵟⴼⵏ ⵙ ⵜⵎⴰⴳⵉⵜ. ⴰⵙⴳⴳⵯⴰⵙ ⵏ 950, ⴷⴰⵜ ⵏ ⵜⵍⴰⵍⵉⵜ ⵏ ⵍⵎⴰⵙⵉⵃ, ⵉⵏⵏⵓⵍⴰ ⵉⵡⴹ ⵏ ⵛⵉⵛⵓⵏⵖ ⴰⵎⵣⵡⴰⵔⵓ ⵙ ⵜⵏⴱⴰⴹⵜ ⴳ ⵎⵉⵚⵕ. ⵏⵜⵜⴰ ⴰⵢⴷ ⵉⵚⴽⴰⵏ ⵜⴰⴳⵍⴷⵉⵜ ⵜⵉⵙⵙ 22 ⵏ ⵉⴷ ⴼⵉⵔⵄⵓⵏ. ⴰⵙⴰⴽⵓⴷ ⴰⴷ ⴰⴷ ⵉⴳⴰⵏ ⴰⵙⵏⵏⵉⴷ ⵏⵏⴰ ⴳ ⵜⵜⵓⵙⵙⵏⵜⵉ ⵓⵙⵙⴰⴽⵓⴷ, ⵃⵎⴰ ⴰⴷ ⵏⵎⵍ ⵉⴷ ⵉⵎⴰⵣⵉⵖⵏ ⴳⴰⵏ ⵉⵇⴱⵓⵔⵏ ⴳ ⵓⵎⵣⵔⵓⵢ.